Ɗek emi onënga ol ga sana kën en pënëra gër « sit » ir këŋun w̃asin Onëgw od Kaxanu od nëmbëta këni gë oniyan ok. (Eyeƴan elo këni w̃acënd ɓëte basari wala tanda. Ɓëliyan ɓën cëŋ, oniyan këni w̃acënd eyeƴan edeɓën el).

Enang ed Kaxanu do gë oñandi odexem el mban xwëɓënëk, ỹoweỹ ano kucax na. Mëŋ ex ɗek er hik gër « sit » ijo ro in er gër Bibël ex. Eyeƴan ed Kaxanu el këɓo sëƴalind ang xëɓënëk enang edexëm ak, ang xëɓënëk enang ed emëlaya ed aye aniyan andeɓi gë okey oko ak. Eyeƴan elo këɓo felënd ene këñënaraye end aniyan and ecan-ecan eŋ.

Gër « sit » ijo ro kën sëk ɓeɓër kën ɓaxët do gë oñëgw od kën xor en pëndëra, axor kën xor en ɓaxët oñëgw od Kaxanu do gë ojëkan od gë Oniyan kë laŋëtand oñëgw oko. Ɓeɓërëmar axor kën xor en ɓaxët, ɓëte axor kën xor en meɗ gë
« otelefon » odewën ok do enëɓi cetëra Ɓëliyan ɓëŝëxe.

Kwël kë ỹana mi ɓasënd gër « sit » ijo ro ɓeɓër këmi faỹend enëmbëta ed gër oniyan ɓën. Akey amat, ari këmi ri « ofidewo ». Këla ɓakawëndën laŋ en nëkonënd ɓengaŝax ɓend këmi xwëtënd ɓeŋ. Pënindën, en ɓaxëtindën, meɗindën er ỹandi këŋun yo xarak koɗi an nëcët na. Nëmbëtayinden gër
« orëdinater », gër « kële USB », gër « otelefon ».

Kaxanu yëlëlenun oɓetak orexëm ol paɓ gë ɓeɓër kën watënd gër « sit » ijo ro ɓën.

Oyekax ol do gë oɓetak ol gilex gë wën!